煲呔曾倒行逆施、不得民心，佢嘅內閣—行政會議成員又個個公開同佢唱反調，完全係腹背受敵。行會召集人CY梁振英前排高調倡議復建居屋，直情當政府依家做緊嘅資助置業諮詢冇到。喺尋日嘅立法會答問大會上，公文袋議員陳淑莊狂插行會嘅集體負責制名存實亡，煲呔曾政府已經變成「跛腳鴨」政府。
不過，煲呔曾唔單止冇黑面，仲力撐CY，話任何政策包括房屋政策，只要喺諮詢階段，意見百花齊放並無問題，指行會仍然操作良好。但煲呔曾補充，如果政府已就某一政策拍板，行會成員要同心同意落實政策。煲呔曾咁講，等同頒咗面免死金牌畀CY，等佢攞正牌鬧政府。CY知道當然高興，仲好快手咁即刻將相關嘅新聞轉貼到網誌，慌死其他人唔知佢有人撐！