本文重點
社民連三子黃毓民、「大舊」陳偉業同「長毛」梁國雄入咗立法會兩三年內，喺議事廳掟蕉、講粗口同肢體暴力等簡直不勝其擾，而喺佢哋力推變相「公投」而集體辭職，議事廳算係過咗幾個月嘅安靜日子喇，點知佢哋補選後重返立會後更加變本加厲，早前政務司司長唐唐就向內務委員會主席劉健儀投訴，社民連嘅黃毓民鬧食環署署長卓永興係「狗官」，話唔能夠再容忍呢種侮辱官員嘅做法，仲語帶威脅話日後若情況重現，唔排除班官拉隊走人。
佢哋當然當唐唐冇到喇，仲預告煲呔曾尋日落立法會答問大會時會玩嘢，最終下場係點？相信各位看官都睇得一清二楚，佢哋大鬧完煲呔曾同白鴿黨喺政改方案一役中黑箱作業同有枱底交易後，咪又係畀立法會主席趕出議事廳囉！佢哋畀人趕離場變咗例行公事咁，但呢次情況有啲唔同，唔再係只有佢哋講，冇人哋講，先係煲呔曾反擊話惡言相向者會自食其果、冇禮貌，跟住白鴿黨都唔再係打不還手，罵不還口，亦咬番轉頭。
問大舊變咗定煲呔曾變咗
話說社民連三子被趕離場後，白鴿黨嘅「肥仔明」李華明喺提問時翻舊帳，話記得喺○五年特首選舉時，大舊你提名畀煲呔曾嘅，依家事隔五年，究竟係大舊變咗吖，抑或係煲呔曾變咗呢？跟住仲話佢唔係問呢個問題，叫煲呔曾唔使答添！即時全場爆笑，而煲呔曾竟然又好配合咁話想答呢個問題喎，但都係得過講字，最後都係冇答到。
眾所周知，由白鴿黨拒絕撐「公投」以至支持政改方案，社民連一直咬住白鴿黨唔放，白鴿黨就保持克制，但喺早前嘅政改辯論中，白鴿黨肥仔明同黃成智開始反擊。呢次仲絕，肥仔明等社民連唔在場先反擊，令佢哋冇機會反駁。所謂容忍有限度，白鴿黨唔再啞忍後，相信日後唔使主席出手將社民連「正法」。