身為潮州人嘅醫管局主席胡定旭向來重鄉情，睇波都預埋鄉里。佢尋日以「潮州商會青委會」名譽顧問身份，叫埋班「家己冷」，即係「潮青」主任Thomas張竣勇、同屬潮人嘅深水埗區議員鄭泳舜、汕頭市潮南區政協委員胡炎松等三十人，深夜兩點幾一齊睇世界盃決賽。
肥胡話今次旨在以波會友，仲無懼肥肚腩，邊睇波邊歎小食。佢話因為佢心水嘅熱捧隊伍早前已出局，惟有轉軚捧荷蘭，當雙方踢到七十分鐘後，肥胡更罕有咁落注買荷蘭同西班牙將以零比零完場，結果畀佢貼中，可惜最後因為押注荷蘭贏波，致贏頭輸尾。佢話輸贏好閒，最緊要開心。
講起今屆世界盃多支勁旅倒灶，Thomas分析話星級球星太錫身，留力打職業賽，好似巴西隊就表現麻麻，令佢失望。