相信大家仲記得當年金利來嘅橫紋、斜點、波點、淨色領呔呢個經典廣告，作為一個咁成熟嘅品牌，自然令人覺得同樣成熟嘅太子爺曾智雄，都係一樣鍾意呢類型嘅男士品牌。
如果你都係咁諗就錯晒喇！身為香港青聯前輩嘅曾智雄，雖然處事成熟，但衣着打扮就非常緊貼潮流，一啲都唔Out。好似早前佢出席活動，就着咗對差唔多千八蚊、好多年輕人都鍾意嘅日本品牌Bape猿人牌波鞋，對鞋雖然係○八年款，但佢仲Keep得好好。
曾智雄話平時工作好忙，個幾月先會行一次街，除咗Bape，其他潮物品牌佢都鍾意，好似佢部iPad就配咗個潮人牛仔褲品牌ed hardy製造嘅iPad機套作保護。
佢仲話買嘢係自己嘅事，從來都唔會假手於人，所以唔使太太做佢嘅軍師陪買衫。話時話，曾智雄咁潮又肯接受新事物，睇嚟遲吓佢同就嚟出世嘅BB都唔會有代溝啦。