呢，早喺白鴿黨轉軚準備支持政改方案時，李漢奸就威脅話要退黨；到白鴿黨正式通過支持政改方案後，佢又話要去外國「冷靜」兩個星期，再決定退唔退黨；好嘞，遊完埠，冷靜完，依然唔見佢退黨，佢話喎，要同黨內外嘅友好研究呢個問題。

唉，李漢奸扭扭擰擰，出爾反爾，反口覆舌，成日將退黨掛喺口邊，但又唔係真退，佢唔覺得煩，人哋都覺得厭啦！

大家都知，李漢奸賣完國家賣香港，賣完香港賣政黨，早已成為過街老鼠，太一叮思疑，萬一有日外星人嚟侵略地球，李漢奸亦會毫不猶疑化身「球奸」，出賣成個地球。所以話，如果李漢奸真係退黨，甚至退出地球，唔止可以令地球乾淨啲，更加可以降低香港嘅噪音指數，簡直係順應天理，合乎民意，都唔知幾多人拍爛手掌。

其實，正所謂無可奈何花落去，似曾相識白鴿來，李漢奸話退又唔退，係有苦衷嘅。佢家陣又唔係立法會議員，又唔係黨主席，個朵又一早臭晒，白鴿黨係佢最後嘅政治舞台，如果連呢個舞台都冇埋，佢仲有乜嘢存在價值呢？普通舊電池就話可以送去堆填區啫，佢呢塊又毒又臭嘅政治舊電池又可以送去邊呢？

所以呢，為咗可以繼續賣國賣港賣黨，李漢奸自編自導呢場退黨騷，目的都係譁眾取寵，自高身價啫。講真啦，退黨又唔係乜嘢大事，要退一早退咗啦，有咩好研究呢？唔通佢又想搞場公投，睇吓市民支唔支持佢退黨？李漢奸將自己退黨當成大新聞咁炒嚟炒去，太一叮只好贈佢一句，「老鼠跌落天平，自己秤自己」，叮！

不過，講到煩，點都唔夠白鴿黨嘅黨友煩，事關李漢奸遊完埠返嚟，厚住面皮唔退黨不特止，仲要繼續玩唱衰，將白鴿黨貶到一文不值。佢話喎，民主黨太過着重民調同選票，好似變咗「民調黨」；仲話佢從來未見過白鴿黨好似依家咁讚到政府上天。點知佢話口未完，白鴿黨主席何俊仁即刻出嚟反駁，話睇唔到依家有邊個政黨唔睇民調做嘢，因為唔睇民調即係唔聽民意；至於講到白鴿黨讚政府，鐵頭仁就更加慶，反問李漢奸究竟聽到白鴿黨邊句讚政府。

又難怪鐵頭仁咁慶，政黨唔跟民意同選票走，唔通要跟李漢奸走，齊齊做漢奸至啱？

講真呀，白鴿黨可能氣數已盡，出咗一個食碗面反碗底嘅黨奸，想有運行都幾難。其實，黨奸賴死唔走，白鴿黨可以主動清理門戶嘅啫，學毛伯伯話齋，「掃帚不到，灰塵照例不會自己跑掉」，只要白鴿黨舉起掃把，李漢奸想賴死都唔得喇！