醫管局主席胡定旭月前做咗香港總商會主席，名副其實成為雙料主席，呢個潮州人一向鍾意食好嘢，更係潮州商會會員俱樂部嘅擁躉，日前佢去食晚飯，仲撞到潮州商會永遠名譽會長莊學山夫婦喺隔籬房食飯。肥胡呢晚亦雙料上陣，菜式係潮州菜，酒卻揀咗四川名酒「舍得」。
肥胡點咗俱樂部出名嘅手撕凍烏頭魚、花雕蛋白蒸肉蟹、蝦棗伴芋卷、燕窩雞茸羹、潮式鹹香雞等做主菜，甜品就點咗玉露鴛鴦同愛心奶皇酥伴桂花糕。「手撕凍烏頭魚」選用元朗新鮮靚烏頭，一條重約兩斤半至三斤，煮熟拆肉後配上秘製醬汁，令人回味無窮。「花雕蛋白蒸肉蟹」嘅蟹都係選用本地肉蟹，配上陳年花雕酒。至於「燕窩雞茸羹」，以前本來係用魚翅做材料，近年為環保先改用燕窩，清淡、有益又養顏。
最特別嘅仲係當晚嘅酒，呢款產自內地四川射洪縣嘅高檔品牌「舍得」白酒，係內地一位部長級官員推薦畀佢嘅，佢一試難忘，可惜香港冇得賣，結果呢位部長第二次嚟香港時，特別帶咗六支送畀佢。肥胡讚呢隻酒酒體香醇而細膩，飲落好舒服，而且「舍得」呢個品牌有哲學理念，寓意人生要領悟「舍」同「得」兩種大智慧，獲好多內地官員追捧。