工聯會「阿王」王國興被視為「建制派長毛」，喺立法會不時聲大夾惡。原來佢大聲之外，對腳都零舍大過人，要着九號鞋，亦因為腳太大，買鞋都好辛苦，試過行勻成條旺角波鞋街，都搵唔到一對着得落嘅鞋，令佢失望而回。
阿王對鞋有幾大？佢用張A4紙簡單度一度，原來鞋頭去到鞋尾長過一張A4紙。佢話呢對巨型腳板係父母遺傳，事實上佢哋全家人都係大腳八。
腳踏四方雖然方便行走江湖，但一買鞋就大件事。阿王話自己知自己事，平時買鞋都唔敢有乜要求，款式係其次，入到鞋舖首先要問有冇佢嘅碼，有就已經好似執到寶咁，拿拿臨畀錢買。
佢仲話，試過行勻成條波鞋街都冇收穫，佢展示嘅呢對鞋，係最近識到一個好心腸嘅鞋舖老闆，特登幫佢喺外地入貨，咁佢先至有得換新鞋咋。