中文大學最近爆出新民主女神像同孫中山銅像風波，跟住又嚟個中大新民主女偶像周澄做過舞小姐嘅熱爆新聞，搞到啱啱上任十日嘅新任校長沈祖堯好唔得閒。沈校長日前出席個活動時話，孫中山銅像擺放問題已經解決咗，遲啲就會公布；至於周澄，沈校長就話，周小姐做緊嗰件事時，仲未係中大學生！呢句回應係要劃清界線吖，定係要澄清冇現時就讀中大嘅學生做舞小姐呢？
沈校長前日同太太出席香港真光書院及中學畢業禮，問到佢對「大專2012」嘅周澄做過舞小姐件事嘅睇法時，沈校長話，校方正安排老師同周澄傾偈，跟住就忽然打住，強調周澄做緊嗰件事時，仲未係中大學生。校長此說可能係想洗脫「中大學生做舞小姐」嘅嫌疑，但作用有幾大，真係見仁見智。
咁新民主女神像擺放喺中大校園又點呢？沈校長直認仲未有頭緒，遲啲要搵學生再傾過。