去愛爾蘭玩完一輪嘅白鴿黨創黨主席「李漢奸」李柱銘，一返香港又將自己退唔退黨吊高嚟賣，話仲未決定，但對腹背受敵嘅白鴿黨就踩多一腳，話本來叫民主黨嘅白鴿黨已經淪為「民調黨」。佢遲遲唔講自己退唔退黨，目的都係想做風頭躉，不甘寂寞，只係猛踩自己嘅黨，卒之激到白鴿黨主席鐵頭仁都忍唔住出嚟反駁，話白鴿黨只係重視民意，亦從冇讚過政府。
李漢奸之前話去旅行時會思考自己嘅去向，點知假期玩完，佢又話掛住欣賞風景，故意唔去諗退黨問題喎，真係前言不對後語，冇厘誠信。轉個頭，佢又去電台批評白鴿黨，話提出同接受呢個改良版區議會方案係錯誤決定，又指摘白鴿黨太注重民調同選票，好似變咗「民調黨」，跟住又話白鴿黨愈嚟愈似建制派，猛讚政府。對於自己嘅去留，佢就話做咗白鴿黨裏面嘅反對派多年，希望仍然有影響力、有人聽佢講嘢。
佢一邊抹黑同唱衰白鴿黨，一邊又當正公文袋係親生仔咁，五區「公投」一役，又公然企喺公社兩黨嗰一邊，處處都手指拗出唔拗入，咁劣迹斑斑，難怪白鴿黨唔少人已視佢為負資產，更透露黨內對佢始終唔肯講清楚去向好唔滿意，懷疑佢跳草裙舞係別有居心。核心人士仲話，大部分黨員對李漢奸嘅去留唔再強求，只希望佢早啲走人，唔好再搞衰個黨。