煲呔曾雖然大搞起錨騷，但一樣畀白鴿黨主席鐵頭仁形容喺本港政制問題上「廢廢哋」，日前立法會廠商會代表林大輝出咗份立法會工作通訊，封面大字標題係「政改方案．締造歷史」，大相主角卻係疑似特首參選人、政務司司長「唐唐」唐英年，好似暗示唐唐先至係政改大功臣，大輝呢一着即係擺明剃煲呔曾眼眉啫！
係人都知大輝係唐唐「家臣」，今次佢唔避嫌撐唐唐，真係太招搖喇。雖然政改方案係過咗，但本地立法爆利益爭奪戰、區議會委任制又未傾掂，加上政局大洗牌，各黨派明年區議會選舉策略大亂，一籃子問題未解決，政局仲有排亂，喺政改上領功會唔會太早呢？
而且就算論功行賞，喺政改斡旋過程中，特區政府到底做咗幾多嘢、出咗幾多力，市民眉精眼企，一定心裏有數啦！所以唐唐或煲呔曾想藉搶版位嚟爭功，呢個如意算盤未必打得響囉！