其他華仁舊生如前立法局主席黃宏發，尋晚都出山朗誦英文版宋詞《滿江紅》。發叔近年埋首將唐詩譯成英文，莫非連宋詞都譯埋？至於七一年九華畢業嘅盈拓副主席袁天凡，尋晚竟然表演魔術，佢話好認真對待今次表演，事前練習咗好多次，太太就做佢服裝顧問。

一向力撐華仁嘅馬會主席陳祖澤（John），一如去年唱英文歌籌款，今次唱英文版《禪院鐘聲》，難度都幾高吓，事關曲調愈唱愈快，中文已經夠難唱，英文就更加唔使講，但阿John唱咗咁耐英文粵曲，又點會難倒佢吖！