本文重點
停車熄匙條例仲喺審議階段，本港已有職業司機懷疑喺酷熱天氣警告下停車熄匙被熱死，搞到草案審議工作受到好大挫折，連曾經一度表態支持停車熄匙嘅政黨都喺交通運輸界怒吼下退縮，各界怒氣升溫，停車熄匙政策陷入喺酷熱中被蒸發嘅危機。負責呢個政策嘅環境局局長邱騰華最初兩日都同運輸界見吓面、捱吓鬧，不過之後就極速快閃，連去立法會受靶同公布喺修例中加入酷熱同暴雨天氣下豁免熄匙嘅措施，都要搵環保署副署長陳嘉信頂上，習慣咗熱廚房嘅佢，似乎捱唔住熱汽車噃！
余若薇被揶揄轉軚
上個禮拜中期，二十幾個運輸界人士操上環境局，邱騰華最初都冇現身，直到司機大佬嫌同佢哋見面嘅官員「官太細」，邱騰華先迫不得已同佢哋見面。之後，佢又冇咗影，連立法會《汽車引擎空轉（定額罰款）條例草案》嘅委員會會議都冇現身，累到陳嘉信畀議員鬧到七彩。
不過，邱騰華識匿，立法會都好叻捉人，點名要佢喺今個月二十六號落去的士站、小巴站體驗吓。有議員透露，原本佢哋想搵大暑日、即係二十三號去體驗，等邱騰華試吓變「熱騰華」嘅滋味，但係落區體驗要協調各方面，最後惟有揀個比較接近大暑日嘅日子。
最搞笑嘅係，熱死司機事件之後，有啲撐環保嘅議員急謀轉軚，公文袋黨魁余若薇就畀人揶揄，話佢過去口響響話希望停車熄匙法例盡快落實，近日就改口為「有保留」。其他政黨亦打落水狗，抦政府無良，好似唔記得咗佢哋嘅環保政綱咁。
呢一幕睇得環保界人士非常眼冤，曾經喺高鐵工程上支持錦上路方案、同政府頂到行嘅香港理工大學土木及結構工程學系副教授熊永達，尋日卻跳出嚟做勇者，喺個電台節目撰文，狠批「許多原本支持法案的立法會議員都準備轉軚」，又斥責「一些『西瓜靠大邊』的時事評論」亂咁噏。睇嚟，呢一場停車熄匙嘅爭拗有排都未收到科，仲分分鐘會演變成另一個政壇照妖鏡，照出究竟邊啲係假環保分子，喺選票同利益之下打倒昨日的我。