話時話,港府唔係成立咗樹木辦咩?因乜事要由政黨查樹呀?冇錯,自從前年發生赤柱冧樹砸死女大學生事件後,當局的而且確由政務司司長唐英年掛帥,做咗一輪大龍鳳,提出一大堆建議,而且疊床架屋咁成立咗一個樹木辦,聲稱可以統籌各部門嘅管樹工作咁話,可惜到頭來又係雷聲大雨點小,樹木辦根本形同虛設。
正如有政黨踢爆,樹木辦只喺中央層面制訂政策,前線工作仍分散各部門負責,一句講晒,同樣係各自為政。呢,早排中區政府總部門口冧咗一棵大榕樹,搞咗半日先至由康文署出嚟認頭,更搞笑嘅係,當康文署人員要鋸走殘枝嘅時候,樹木辦居然阻止。好明顯,雖然有咗樹木辦,但樹木無王管嘅亂象一啲都冇改善。
政黨建議喺十八區分別成立樹木管理隊,解決樹木辦「有將冇兵」嘅問題。計太一叮話齋,呢個意見唔係話唔好,不過睇怕好難行得通,事關政府不嬲都係部門愈多,愈冇人做嘢,大家鬥卸責、鬥扯皮。以樹木管理為例,家陣嘅問題唔係冇部門管,而係部門太多,搞到三個和尚無水食,如果各區再成立樹木管理隊,咪又係多隻香爐多隻鬼。
其實樹木辦絕對唔係有將冇兵,淨係康文署屬下嘅樹木管理隊就有幾百人,其中好多仲係飲過鹹水嘅專家添,撻個朵出嚟嚇死人,可惜銀樣鑞槍頭,睇得唔打得。遠嘅唔講,就講早前沙田圓洲角冧樹殺人嗰單畸士,當局事發前一個月先至檢查過,話冇問題喎,點知話口未完就出事。難為班高官仲死撐,話佢哋嘅所謂目視法符合國際標準添。叮,靠呢班只識卸責嘅人管理樹木,再成立多幾個部門都冇用啦。
更得人驚嘅係,當局早排係威係勢搞咗一次全港樹木風險評估,確定有二千棵樹需要進一步跟進。二千棵樹有問題,等於二千個計時炸彈,唔係小事,點知樹木辦懶神秘,居然乜都唔肯透露,呢啲樹喺邊度、病成點、會唔會冧,市民到依家仲係矇查查。大佬呀,咁搞法分分鐘出人命o架,靠害咩!
唔好話太一叮唔提醒,颱風季節好快就到,如果當局仲係漫不經心,冧樹慘劇一定陸續有來,到時睇吓邊個官員孭得起呢隻鑊。叮!