由中華總商會會長蔡冠深牽頭搞嘅「中總愛心行動」，尋日去到黃大仙嗇色園可蔭護理安老院，向全院年紀最大嘅一百零五歲人瑞譚婆婆送上利是，其餘六名百歲長者都有份。咁識敬老，一班公公婆婆都識做，向中總獻唱番首生日歌。蔡冠深話賀長者，即係賀埋中總喎，事關今年係中總一百一十周年。
喺長者面前，蔡冠深睇落係最後生嗰位，佢笑言自己有一百一十歲，同中總同齡，但心境就係三十歲，希望中總同佢一樣，繼續活力十足。
講開又講，原來佢兩夫婦同三個囝囝啱啱去完上海世博，之前佢已經去過兩次，但好多館仲未踏足過，於是把握機會喺兩日內橫掃二十五個館，攰到夜晚返酒店要不停按腳。
中總一百一十歲生日，慶祝節目陸續嚟。位於中環干諾道中嘅中總總壇，經八個月大執後終於完工，下禮拜五舉行新貌開幕禮；據聞呢個月底，仲會請埋國家六位太空人包括首位太空人楊利偉訪港。請得郁六位「飛人」來港，中總面子都唔細噃。