政府官員同立法會議員喺議事廳駁火見怪不怪，但政務司司長唐唐早排忍唔住向內務委員會主席劉健儀投訴，不滿早前社民連嘅議員鬧食環署署長卓永興係「狗官」，仲話如果再發生官員被議員侮辱場面，官員有可能拉隊離場咁話。件事點發展仲要睇落去，但畀人投訴嘅社民連尋日又藉機發難。
立法會下禮拜三將會喺休會辯論時段，討論防止塌樹方案，好多議員都希望唐唐屆時親身出席，但政府到依家仲係傾向搵發展局局長林鄭月娥出嚟應付議員，搞到社民連「大舊」陳偉業好不滿，尋日喺內會發言時炮轟唐唐唔出席會議係唔尊重職責同立法會，既然司長係負責管理樹木嘅最高領導，冇理由推推搪搪、扭扭擰擰，只係識得「條條fing」！
大舊愈講愈興奮，話司長只係得把口，講就天下無敵，行為就極之醜陋，立法會應該譴責埋佢添。唐唐早排投訴社民連件事仲未完，大舊今次藉內會發言嘅機會借題發揮，攞棵樹掃唐唐，又睇吓唐唐點回應嘞！