按勢力版圖，五席「超級議席」，建制派同民主派應各取兩席，最後一席選情緊湊，但以民主派稍佔優。以建制派嚟講，最夠資格落場拗手瓜嘅，係建仔同工聯會，而建仔必借勢捧新人，據聞工聯會亦好想分一杯羹。

「巡迴表演」發揮「膽拖」作用

工聯會內部開始有人游說曾經做過「票后」嘅陳婉嫻重出江湖，雖然嫻姐冇乜意思出山，但一名工聯會高層話，比起今年三、四月游說嫻姐出戰五區補選，今次應該容易些少，事關補選嫻姐未必穩勝公文袋嘅梁家傑，兼且咁辛苦贏咗都只係做兩年議員，同「超級議席」唔可以相提並論。

況且，地區直選新增五席，工聯會內除黃國健同王國興分別喺九龍東同新界西競逐連任外，葉偉明落新界東、潘佩璆出戰港島嘅可能性大增，若然嫻姐出山，全港「巡迴表演」就可發揮「膽拖」作用，順便為四區造勢，呢條「纜」有數圍。但嫻姐係咪會出山，依家仲係言之尚早。

與此同時，保安局前局長葉劉淑儀亦放風話考慮出戰，佢尋日話若然成真，要先喺下年區議會選舉跑出，首選港島山頂區，或同公文袋陳淑莊對撼，不過佢都係嗰句，一切未有最後決定。對有傳佢出戰「超級議席」，目的為一二年選特首，葉劉就話：「到時我都老啦。」一招太極拳就將敏感問題耍過去。