政府憲報錯漏百出早有前科，年前刊錯憲，誤將民政事務局局長曾德成私人休假，寫成離港公幹，由副局長許曉暉署任，結果被本報踢爆搞錯。話口未完，又擺多一次烏龍，七月一號公布委任八十七名太平紳士咁大件事，竟然冇對清楚就將資料刊出，誤將華置董事劉鳴煒個名，寫成「劉明煒」，真係貽笑大方！尋日政府終於刊憲認錯，更正番佢個名。
喺委任名單中，亦出現疑似錯名之誤，話說「鋼鐵公主」陳寧濘亦獲委任為太平紳士，但喺政府憲報入面，陳小姐個「濘」字少咗「三點水」，但行政署就解釋話，陳小姐身份證上確實係寫「陳寧寧」喎。連委任太平紳士都搞出咁多風波，認真無謂！