大熱天時三十幾度食煨番薯？肥亨笑笑口咁話自己離開政府將近兩年，諗起○八年七月十一號離職當日，同事知佢鍾意食煨番薯，特登去呢間舖頭買煨番薯同佢餞行，可惜當時太匆忙冇嗒真啲味道，所以問啲舊同事攞番個地址，專程去買嚟回味吓。

肥亨買嘅煨番薯叫「北京極品糖心番薯」，特色係皮薄冇根又冇渣，香甜滑似蓮蓉，佢最後買咗三磅幾，老闆仲打咗個九折畀佢，佢話準備攞返去請生意拍檔中策集團副主席柯清輝食。