立法會議事規則規定，之前發問次數最少嘅議員可以優先提問，而早前公文袋同社民連力推變相「公投」，喺五區補選重返立法會嘅五個議員，全部重新計數，全部都可以喺答問大會優先提問。

社民連三子講明繼續火爆

煲呔曾搞起錨騷變倒米騷，變相倒錢落鹹水海；而白鴿黨則轉軚支持政改方案，日前啱啱發表同中央談判過程嘅報告書，企圖為被外界狂轟「賣民主、賣港同賣黨」消毒洗底。公文袋同社民連都質疑白鴿黨同特區政府、中央有枱底交易，睇怕公社兩黨嘅議員肯定會咬住唔放，狂轟煲呔曾。

發頭炮嘅將會係曾經喺特首選舉挑戰過煲呔曾嘅公文袋袋巾傑，當然仲有佢嘅黨友陳淑莊啦，而社民連嘅黃毓民、梁國雄同陳偉業三子，以前喺議事廳都曾經向煲呔曾掟過蕉，亦講明呢次重返議事廳唔會改變衝擊議會文化嘅作風，貫徹佢哋火爆作風嘅話，到時可能唔止掟蕉咁簡單。

煲呔曾咪以為接得住呢五個炸彈就搞得掂，事關公社兩黨呢五個議員係「零」提問，所以分分鐘可以問多轉，試問佢兩手點可以接得住十個炸彈？

除咗公社兩黨之外，排住隊嘅仲有白鴿黨嘅李華明、涂謹申同甘乃威，無論係政治或者民生問題，例如復建居屋等，佢哋都一樣唔會放過煲呔曾；繼而係五散人嘅林大輝，佢身兼委任區議員，睇怕佢會喺政府取消區議會委任制方面質到煲呔曾暈低；再加上政府就嚟就醫療融資諮詢，呢瓣咁惹火，另一散人、醫學界嘅梁家騮實唔會留手，煲呔曾肯定火燒身。

班議員連環發炮，煲呔曾唔係千手觀音，當然接唔晒，惟有企定定畀佢哋硬炸，就算佢着避彈衣都頂唔住，實變硬炮灰！