本港五月底以來最少已發生五單老鼠咬人事件，人人擔心成為老鼠「下一餐」嘅目標，簡直係聞鼠色變。不過，香港官員出咗名面皮夠厚，為咗卸膊，幾搞笑嘅理由都諗得出、噏得出。

先有食衞局局長周一嶽賴近排雨水多，將老鼠趕出地面嘅「水漲鼠多」歪理；跟手有副局長梁卓偉指老鼠食咗鼠藥之後口渴，日光日白出嚟咬人嘅「偉論」，就差冇講到明「老鼠咬人好正常」啫。

唉，成日都話高官鼠目寸光，一啲都冇鬧錯。查實，只要稍微留意時事新聞，就可以搵出N種鼠患成災嘅理由啦。呢，聲稱要「超港趕滬」嘅印度孟買，因為天氣炎熱加上鼠藥失效，「鼠口」突然激增。當局要出動配備木棍、電筒同鐵籠「三寶」嘅「夜之打鼠隊」，晚晚人鼠大戰。

如果話印度較落後，有鼠患唔出奇，又不妨睇吓名副其實嘅國際金融中心美國紐約，除咗通街老鼠，連地鐵站亦告失守，成為鼠輩天堂。不過咯喎，講到鼠患，內地更加係出晒名，當年湖南二十億隻老鼠大鬧洞庭湖，簡直係p:賓虛咁嘅場面。

所以話啫，食環署可以大條道理話，印度係咁，紐約又係咁，全世界都係咁，香港通街老鼠有乜值得大驚小怪？呢啲唔係當局滅鼠不力，而係要「同國際接軌」吖嘛。如果搵隻老鼠都冇，點叫國際大都會？點同紐約揮呀？嗱，咁咪掂囉，使乜到頭都爆，諗出啲咁無厘頭又搞笑嘅爛Gag屎橋吖。

話時話，有樣嘢如果食環署唔解釋清楚，都幾大劑。當局堅稱鼠藥冇問題，只不過老鼠食咗之後會好似人飲醉咁迷迷糊糊，如果有人喺前面稍微郁吓，老鼠或會誤以為受襲，主動攻擊喎。

講到鬼咁逼真，好似官員自己食過咁，但就係唔交代到底係乜藥，算點先？聽來聽去，係咪鼠藥唔敢講，不過就似無良庸醫偷偷賣嘅過期春藥多啲。

前排茶果嶺有位老伯一個月內先後被老鼠咬完左腳咬右腳，根據官員嘅偉大理論，你慌老鼠唔係食藥食到High晒咩。老鼠咬人唔出奇，咬完左腳咬右腳都未算新聞，如果High到連人哋「第三隻腳」都咬埋，咁就一定成為國際大新聞咯。講真，香港幾怪都有，冇人擔保咁騎呢嘅事唔會發生。

港府懶官多，負責滅鼠嘅食環署更加係專出「蛇王」，有鼠唔捉，有患唔除，老鼠遇着懶官，蛇鼠一窩，唔惡至奇。唔怪得食環署再次蟬聯申訴專員公署投訴榜冠軍啦。叮！