行政、立法關係愈嚟愈差，議事廳更加係駁火嘅主要戰場，語言暴力不斷升級，官員變成議員用嚟祭旗嘅箭靶。政務司司長唐唐投訴多次無效後，最近終向內會發最後通牒，投訴六月底食物安全及環境衞生事務委員會開特別會議，討論民主女神像被當局沒收時，署長卓永興被社民連黃毓民鬧係「狗官」，聲言如再發生同類事件，官員可能拉隊離席抗議。
立法會聲名大不如前，如果以後官員開開吓會，因不甘受辱集體起錨離場，香港議會真係唔知變成乜嘢景象。
有建制派政黨核心話投資可賺可蝕，涉及風險，立法會若賦權予事務委員會主席，驅逐出言辱官嘅議員離場，代價一樣可大可小，涉及巨大政治風險，事關部分事務委員會規模細小，有啲政黨只有一個代表在內，如果因批評官員時言論出位，就被主席裁決要收回言論，甚至被趕離場，肯定掀起爭議。如果主席同被逐議員嚟自意識形態唔同嘅政黨，分屬選舉競爭對手，就更加惹嚟藉機「打壓對手」嘅非議，尤其未來兩年分別有區議會選舉同立法會選舉，好易被人質疑係咪想對手喺議會「滅聲」先？
為免捲入政治漩渦，建制派已有默契，表明對政府愛莫能助，唔會出手箝制泛民，議事規則委員會今次開「快勞」受理政府投訴，只屬例行公事。唐唐向立法會告泛民狀，唔理佢事先有冇同建制派摸過底，最終結果九成九又係不了了之，食硬檸檬啦！