東施效顰提滅鼠辯論

最近香港又接連發生多宗老鼠咬傷人事件，靠捉老鼠起家嘅專業會議議員「鼠王芬」梁美芬立即有樣學樣，要求喺下禮拜三立法會就鼠患問題提出緊急質詢同休會辯論，點知東施效顰甩轆！

立法會主席日前回覆鼠王芬，指鼠患問題雖然涉及公眾利益，但唔似冧樹咁有緊急性，唔符合提出緊急辯論嘅條件。根據同一原則，相信佢條緊急質詢亦會凍過水。

最瘀嘅係，鼠王芬向主席申辯提出緊急質詢嘅理據時，將食物及衞生局嘅簡稱「食衞局」寫錯咗做「衞福局」，時光倒流返去幾年前政府未改組嘅時代，不過今次就唔知係佢自己定係啲助理搞錯嘞！

咁啱近日發生有香港導遊強迫內地客購物事件，旅遊界議員謝偉俊尋日亦入紙申請喺下禮拜三就強迫內地旅客購物問題提出緊急質詢，原因係十一長假期嚟緊喎！又睇吓佢過唔過到關。