煲呔曾推行嘅擴大問責制以高薪聘用嗰隊「八國聯軍」副局長同政治助理，話咁快就做咗兩年，係時候做中期檢討，當中有幾多人嘅表現合格？正如有部分人評價唔係太差嘅教育局副局長陳維安，早前頻頻為學校驗毒計劃出嚟解畫，論誠意已經好過部分玩龜縮嘅司局長，咁又係咪可以過關呢？
曾經做過馬會馬場事務部總監嘅陳維安，尋日首次以官式身份返馬會「娘家」，出席一項有關賽馬培訓課程通過政府資歷認可嘅證書頒發典禮，佢話好開心見番啲舊同事，包括賽馬事務執行總監利達賢。
被問到馬會同副局長工作嘅比較，佢話兩邊工作一樣咁忙，以前喺馬會一個禮拜做兩日賽馬，由朝做到晚，依家放工後都有好多應酬，工作時間一樣咁長，但係做嘢最緊要開心，錢唔係咁重要！