呢排天氣酷熱，問佢覺唔覺香港真係熱咗好多，起初佢點都唔肯講天氣話題，話應該留畀天文台去講，仲話退休人士應該知自己企喺邊，所以唔想講太多。既然唔講天氣，咁不如講政府環保政策，例如呢排熱到爆嘅停車熄匙啦！

早排有小巴司機懷疑因響應政府呼籲停車熄匙而焗死，唔知佢點睇呢？黑英可能知道呢個話題太敏感，始終唔肯評論，只係肯話自己「唔會管人，只會管自己」。

唔會埋CY班做局長

雖然黑英把口點樣撬都撬唔開，但轉過背就話佢平時好少開冷氣，即使好似呢幾日天氣咁熱都堅決唔開，仲話個仔由細到大坐佢車都唔會開冷氣，等個仔學吓捱苦。真係一年三百六十五日都唔開？佢就話除非太太開到口，否則一定唔會開。

竟然搬老婆出嚟添！停車熄匙呢條惡法梗係對黑英冇影響啦，佢點計都只係偶然唔開冷氣，但係對職業司機嚟講就唔係講玩，日日都要喺車廂焗桑拿焗十幾粒鐘，隨時隨地會冇命！究竟黑英真係唔知啲職業司機嘅疾苦吖，抑或係唔敢出聲呀？少咗個權威人士鬧政府，環境局局長邱騰華肯定笑晒口啦，但係啲職業司機就慘喇！

話時話，黑英喺嚟緊嘅書展會同疑似特首候選人CY梁振英舉行座談會，內容主要都係圍繞本書，佢兩個咁老友，唔知佢又會唔會埋CY班做問責局長呢？黑英即時話唔會，因為管理香港要好大魄力，最好搵啲四、五十歲嘅人才去做，佢自己超晒齡，所以寧願過閒雲野鶴嘅生活喎。