申訴專員黎年上任一年幾，尋日首次向立法會提交年報。齋睇數字，政府部門同公營機構行政問題似乎有改善，望真啲，卸膊文化依然存在。借巴士阿叔句口頭禪：「未解決！未解決！」

申訴專員公署○九至一○年度接獲四千八百幾宗投訴，比○八至○九年度五千三百幾宗減少約一成。咪開心住，有兩樣嘢市民要特別留意。首先，被投訴得最多嘅係食環署，有四百七十幾宗，房屋署同屋宇署緊隨其後，三個部門工作都同市民日常生活息息相關。換句話講，港府喺服務市民方面，唔止差強人意，直頭係肥佬。

其次，雖然申訴專員話部分機構行政問題已有「突破」，仲舉咗郵政署畀市民選擇唔收取冇註明姓名嘅宣傳品，同考評局允許學生索取已批改考試答卷為例。但呢啲不過係細眉細眼濕碎料，市民冇乜特別感覺。

呢，連申訴專員都指政府部門「各家自掃門前雪」心態依然，「為本身角色和職責作狹義詮釋」，部門之間缺乏協調。「狹義詮釋」講白啲，咪即係卸得就卸，有責人哋負囉。

叮！好似樓宇滲水咁，多年來投訴不斷，一直未解決。食環署同屋宇署聯手成立咗滲水辦，但各部門為慳錢怕孭鑊，堅持以短期合約請人做嘢，結果人員頻頻流失，個案處理有頭無尾，「一站式服務」變咗各有各衰。

申訴專員仲狠批個別部門管理層有錯唔認，有事就歸咎前線人員，忘記自身嘅監管責任。其中有一宗滲水個案投訴，食環署好快就承認一名已辭職前線人員有疏漏，不過冇追究上司嘅責任。監察制度有等於冇，咁嘅部門有乜理由唔畀人投訴到爆燈吖？

弊在官僚作風根深柢固，你有你投訴，佢有佢敷衍，唔搞出人命都唔知驚，最明顯例子莫過於危樹處理。前年赤柱冧樹壓死港大女生後，當局煞有介事喺今年初成立樹木管理辦事處同綠化及園境辦事處，但涉及樹木管理嘅多個部門仍然係各自為政，連風險評估標準都冇辦法統一。直到前排沙田圓洲角重演冧樹殺人慘劇，當局至應承公布危樹名冊，後知後覺到麻木不仁！

有立法會議員批評話，政府部門各顧各會好大劑，搞到市民好慘。計太一叮話齋，家陣官衙個個飽食終日等出糧，特衰政府早已經係跛腳鴨，滲水辦變漏氣辦，樹木辦變廢柴辦，又有乜出奇吖？叮！