立法會前議員楊孝華有兩個公子，一個楊哲寧（Jonathan），另一個就係入咗政府做政治助理嘅楊哲安，尋日中環置地廣場嘅貴族鞋店TASSELS開幕，其中一個老闆就係Jonathan，佢哋一家撐場外，仲有幾十位政商界名人到賀，富貴黨嘅資深黨員更齊齊捧場。
Jonathan經營鞋業生意七年，月前再投資幾百萬，同富貴黨前副主席周梁淑怡（莎姐）二女婿袁正文拍檔賣尊貴靚鞋，其中一個牌子，就係英國查理斯王子都着嘅Edward Green，呢個牌子喺英國有逾百年歷史，Jonathan仲即場着上一對價值八千二百五十元嘅啡色Edward Green皮鞋，自己做埋生招牌添。
愛着靚鞋嘅旅發局主席田北俊都嚟湊熱鬧，莎姐代女婿招呼田少，向佢推介一對Loafer鞋，點知田少嫌鞋底唔夠軟：「我着鞋一定要軟熟，揸車時至容易感應到油門。」佢尋日就着咗對Salvatore Ferragamo亮相。講講吓，田少又攞起鞋架上一對價值六千元嘅美國經典品牌Alden黑色綁帶Boot，向身邊嘅富貴黨副主席方剛話：「對鞋夠硬淨，啱晒你着去立法會開會同人『片』過噃。」