香港人愈來愈關注民生，其中一個原因就係貧富懸殊，尋日立法會開會嗰陣，代表勞工界嘅議員李鳳英對政府嘅扶貧工作非常勞氣，一矢中的咁質問：「為乜嘢我哋嘅扶貧工作愈扶愈貧！」
負責呢個政責嘅勞工及福利局局長張建宗梗係唔接招，只係不斷如數家珍咁數一次現行嘅措施，好似政府做咗好多嘢，但效果就冇人理。英姐跟住好唔客氣咁話，政府嘅扶貧工作之所以愈扶愈貧，原因同扶貧冇從源頭入手有關，來來去去都只係推出啲表面而零碎嘅措施，所以香港依然係貧富懸殊問題嚴重嘅地區。
愈做愈衰、愈扶愈貧呢啲事一再發生，顯示政府考慮政策、研究對策時已經好多問題，但高官懶理，只知擒擒青推行，結果咪係咁囉！