樓梯意外多，民協嘅馮檢基日前返屋企時唔小心跣親，碌落兩級樓梯先停低，尋日要撐拐杖、以鐵拐基嘅形象去立法會報到，只見佢跛吓跛吓進入議席時，唔覺意撞到傷口，即時痛到彎低身。立法會下個禮拜就休會，阿基原本一早約咗個今年讀中三嘅囝囝下個月去九寨溝玩，點知忽然受傷，未必去得成，今次真係發夢先去到囉。
阿基話，前晚返屋企時，沿樓梯行上騎樓，點知樓梯有水漬，佢右腳一跣，向下碌咗兩級樓梯，表面傷勢唔大，但左腳膝頭扭傷，當晚佢未知痛，深宵仲觀賞世界盃荷蘭對烏拉圭大戰，但第朝瞓醒即劇痛難當，即刻去照X光，開完會後，仲會去睇跌打。
講到呢條樓梯，阿基都一肚氣，事關佢已經第二次喺同一條樓梯中招，兩年前曾經跌傷膊頭，患處到依家都仲痛，所以佢覺得當務之急係睇睇條樓梯嘅結構有乜問題，以免發生第三次意外。至於同囝囝嘅九寨溝之約，佢就話囝囝可能會好失望。