特區政府最叻就係議而不決，煲呔曾舊年十月喺施政報告宣布咗慳電膽現金券計劃，因此爆出益親家醜聞，事後要急急宣布延遲推出，唔經唔覺已經拖咗十個月，呢一百蚊現金券幾時派都係冇人知！尋日立法會質詢政府每年回收慳電膽嘅數字，又再畀人問慳電膽券幾時出台，結果都係得個吉。
一百蚊慳電膽現金券原定今年二月派發，但因益親家事件延期，四月嗰陣，環保界一度盛傳慳電膽券再出台，最終又令人失望，轉眼又過兩個月，煲呔曾仲想拖到幾時？唔通想等到十月施政報告，即係慳電膽醜聞一周年先至公布？
我哋問過政府中人，回覆係慳電膽券「永遠唔會難產」，即係會繼續研究，但研究啲乜嘢？呢位知情人士又講唔出所以然，最慘仲係，喺慳電膽事件上曾經「以身護主」嘅環境局局長邱騰華近日為停車熄匙爭議自身難保，瓣瓣都失火，仲邊得閒搞慳電膽現金券呢？