亞視前主席張永霖（Linus）一向愛好收藏古董名畫同名錶，中國當代著名畫家吳冠中上個月逝世，Linus講起都話相當惋惜，佢十幾年前有幸同吳冠中見過一面，幾年前，仲買咗一幅吳冠中嘅十吋乘十吋山水畫，一直珍而重之，依家更加要好好珍惜、妥加收藏，對佢嚟講，幅畫升唔升值唔係最重要嘅，因為佢志在收藏啫！
自從離開亞視後，Linus多咗時間玩番佢心愛嘅名畫同名錶，但自嘲家陣無業無收入，就算遲吓去蘇富比拍賣會都係睇吓，未必會競投，主要同班老友交流吓玩古董心得。Linus又話，近年啲名畫愈來愈貴，皆因內地經濟起飛，人民富裕起來，自然對名畫多咗留意同重視，變成賣價提高，出價又高，唔貴都幾難。Linus買錶買畫志在收藏，價錢升高自然要買貴嘢，又難怪佢呻嘅！