本文重點
沙田早前發生冧樹致死意外，立法會尋日討論件事時，好多議員都質問花咗二千幾萬公帑開設嘅樹木辦做咗啲乜？鄉議局副主席張學明更大爆港府種錯樹，引進一啲快生長但唔適合本港嘅樹木，佢認為港府管理樹木前，應該從種植適合本港嘅樹開始。
鄉郊長大變樹木專家
張學明話，自己細細個喺鄉郊長大，對樹木嘅認識都好多，政府依家種唔少台灣相思、石栗同細葉榕等，根本就唔啱喺香港種，據佢話，港英政府之所以種咁多台灣相思呢類樹木，原因係六、七十年代香港不時發生山火，燒咗好多樹，為咗盡快令各個山頭變番綠葉成蔭，所以選咗呢啲快高長大嘅樹種。
不過，呢啲樹木並唔一定啱本港，反而本地原產樹如樟樹等，就應該多種一啲。張學明認為，為咗安全計，政府應該移除一啲唔適合香港嘅樹。佢講起樹木就滔滔不絕，真係成個本土樹木專家咁。