舊人前區議員爭入黨

白鴿黨同中央談判嘅部分內容相繼曝光後，尋日立法會大會，好多人都關注件事，高達更順勢透露，七一遊行之後，黨部收到張十五萬五千蚊嘅大支票，筆錢由一個曾經捐助過民主黨嘅人士捐出。呢筆錢加上七一當日白鴿黨喺三個街站籌到嘅四萬五千蚊，啱啱有二十萬，雖然比起社民連嘅二十六萬仍有不如，不過就已經同公文袋打和。

高達解釋，今年佢哋只係擺咗三個街站，比舊年八個街站少，依家捐款去到二十萬，同舊年收到嘅二十至三十萬捐款距離已縮窄。除吸水之外，白鴿黨近期都多咗人要求入黨，高達話政改方案通過僅兩個禮拜，該黨已經收到十幾人嘅入黨申請，其中有曾經退黨嘅舊人，亦有做過區議員嘅政壇中人，甚至係社運界嘅人士等，高達仲好有針對性咁爆咗句：「我哋唔可以畀嗰啲少數但大聲嘅人（聲音），蓋過沉默但多數嘅人。」

另一方面，社民連嘅黃毓民尋日再度質疑白鴿黨公布報告只係為「撲火」，質疑對方「唧牙膏」式放料無誠意。黃毓民仲話，煲呔曾曾經講過「玩鋪勁」，事後畀白鴿黨用呢句話抽水兩至三年，家吓白鴿黨自己違背爭取二○一二年雙普選嘅承諾，但就遲遲冇向選民道歉噃。睇嚟，白鴿黨做幾多形象工程，社民連都唔收貨。