呢，「悲情城市」天水圍又爆嚴重家暴個案，幾乎重演倫常慘劇。尋日下晝天恩邨一個綜援家庭，老公因為電視轉台問題當住兩個仔面前同老婆嗌交，先互潑滾水，嘈嘈吓男子突然攞起生果刀襲擊對方。女事主被刺多刀，右大腿大動脈刺穿，鮮血狂湧，要送深切治療部留醫。涉嫌傷人男子爬出窗外危坐，擾攘近六個鐘後被捕。

本港家暴問題愈來愈嚴重，當局如果唔正視，唔增撥資源協助受害者，唔從根本上消除引發家庭暴力嘅種種負面因素，慘劇只會無日無之。

「贏咗一場交，輸咗一個家，值得咩？」社署廣告片拍得鬼咁動人，口號就鬼咁動聽，但係對家暴受害人嘅支援就到喉唔到肺。嗱，舊年全港有四千八百幾單虐待配偶個案，虐待兒童個案近千單，兩項加埋近六千幾受害者，但政府每年只係撥款五百萬元畀相關支援服務，杯水車薪，家暴數字唔飆升至奇啦。

叮！貧賤夫妻百事哀，講真，好多個案之所以悲劇收場，同貧窮絕對有關。鹹魚白菜也好好味？唱歌仔就得。如果一個家庭經濟支柱搵朝唔得晚，主婦成日要憂柴憂米，仔女連課外活動都冇錢參加，有乜辦法唔日日家嘈屋閉吖？長此以往，走投無路，分分鐘因為睇唔開而走上絕路，甚至攬住仔女一齊死。

月前東涌逸東邨有位媽咪懷疑因為丈夫失業同債務困擾等問題，攬埋四歲嘅女跳樓，女事主當場死亡，女兒受重傷。螻蟻尚且偷生，呢類慘劇表面睇屬於家庭問題，其實係社會問題，反映當局對有需要者缺乏最起碼嘅關愛。如果政府部門主動做嘢，早啲介入，慘劇完全可以避免。

叮！除咗支援不足外，更弊嘅係政府根本就冇心改善。早幾年，天水圍連續發生震驚全港嘅家暴事件，迫於民怨輿情，成班高官爭住湧入去，起勢做親民騷，乜願都許，但係就冇樣做得到，等到事件丟淡，一切又打回原形。呢次差啲搞出倫常慘案，地點咁啱又係天水圍，直頭摑咗當局一巴掌啦。

唉，香港前路愈來愈渺茫，就算經濟真係復甦，亦只有小部分行業同大財團得益。港大民意研究計劃最新調查發現，市民對經濟問題關注程度已經連續十八個月下降，但對民生環境表示不滿嘅已經急升到近五成。

普羅大眾享受唔到經濟發展成果，打工仔捱生捱死，但收入卑微，莫講養家，連自己都幾乎養唔起，呢啲咪叫民不聊生囉。窮人坐困愁城冇出路，家庭點會和諧，民怨點會唔爆煲吖？叮！