世界盃四強大戰上演，但好多球迷原先力撐嘅愛隊已經出局，唔少人惟有變心再捧新勁旅。好似原本支持英格蘭同埋巴西嘅醫管局主席胡定旭，已轉做德國隊擁躉，仲會漏夜觀賽力撐添！合和集團太子爺胡文新（Thomas）原本熱捧意大利，但依家轉做西班牙粉絲。
尋晚唔少名人出席一個酒會，席間大講世界盃，肥胡話，世界盃開波以來佢差唔多場場都睇，佢係英格蘭隊嘅支持者，點知英格蘭好快就執包袱返鄉下。依家佢睇好德國隊，今日凌晨會觀賽以示支持。雖然要捱到半夜兩點半至有得睇，但肥胡自爆平時慣咗夜瞓，所以冇咩大問題。
Thomas就話，如果有得瞓一陣先，佢就會起身撐西班牙，否則今朝睇番重播嘅精彩片段算數。佢原本係意大利隊擁躉，但無奈依家失去支持對象，惟有轉投西班牙懷抱。恒隆集團候任董事總經理陳南祿同肥胡一樣睇好德國隊，仲希望冠軍賽見到德國對荷蘭添。