立法會工程界代表何鍾泰手戴一款OMEGA星座錶（Constellation），呢隻錶係家傳之寶，由佢已故父親轉贈畀佢，雖然經歷幾十年風霜，睇落已花花哋，但何鍾泰好愛惜，戴到今日都唔捨得換錶。
何鍾泰話，呢隻係OMEGA五、六十年代款式，當年爸爸以五百蚊買下，以當年物價指數計算，一啲都唔平。有日爸爸想換錶，於是將舊錶轉贈兒子。唔經唔覺，隻錶已跟咗何議員幾十年，銀色錶身難免留下多條花痕，但依然準確無誤。最近去英國旅行，佢仲花咗三英鎊幫隻錶換上一條彈弓錶帶。
OMEGA喺瑞士錶壇締造無數傳奇，星座錶喺1952年相繼面世，其優良品質及精確運行奠定OMEGA品牌形象，成為古董錶發燒友渴望收藏嘅對象。
