政改方案通過後，政圈嘅焦點集中到二○一二年立法會選舉嘅新增五個區議會界別「超級議席」，由於呢個選舉既要睇區議會實力，又要候選人喺全港大選區嘅知名度，所以部分政黨諗住派高知名度老黨員出選，但喺地區坐擁龐大鐵票嘅建仔就以逆向思維，打算搵新星出戰超級議席，而首張新王牌就係沙田區議員葛珮帆。
建仔高層計過數，超級議席嘅選民有三百二十萬人，以投票率五成左右計算，都有一百五十萬名選民投票，如果分攤五個位，平均每張名單攞二十萬票就穩勝，○八年，建仔喺新界東同新界西得票已經約二十萬張，所以一二年嘅超級議席分分鐘可以「坐一望二」。內部消息指葛珮帆呼聲好高，事關四年前佢原本有機會喺新東出戰，後來本想空降港島嘅陳克勤回巢新東。其他被傳嘅新秀仲有副主席張國鈞、荃灣區議員陳恆鑌同深水埗區議員鄭泳舜。