熱浪襲港，過去幾日天文台日日都發出酷熱警告，中暑、暈低嘅新聞不絕，日前更有小巴司機因響應停車熄匙而焗暈車內不治。業界批評政府推行停車熄匙，搞到司機被迫乾蒸，不過，立法會議員黃宜弘（IQ博士）就話，廿幾年前都冇冷氣，當時嘅人咪又咁過，仲話涼冷氣係習慣問題添。
IQ博士雖然講得輕鬆，但佢嘅道理就未必通，因為佢話：「廿幾年前啲車輛同屋企都無冷氣啦，咪又係咁過！」但係廿幾年前，溫度有冇持續咁多日三十幾度呢？而且當時大家都冇冷氣，最少唔會有好多溫室氣體排放，但依家高樓大廈、屋邨單位甚至大小車輛冷氣機排放嘅熱氣卻令人㷫合合。
更何況，中暑暈倒嘅消息成日發生，可見好多市民嘅身體根本承受唔到呢啲高熱，呢啲已經唔係習慣問題啦！