白鴿黨為澄清密室政治質疑，決定將同中央談判過程寫成報告公諸於世，負責執筆嘅就係做開教師嘅張文光，孭上呢個工作後，張文即刻開工，仲搞到捱更抵夜添，短短幾日間，份報告已經寫到第七稿，點解要寫成七稿咁多，張文冇好氣咁話，咪劉慧卿好帶挈囉！
張文話，佢由上星期六開始寫報告，平時寫親呢啲嘢，最多寫兩稿就交得貨，今次份報告卻前後改咗七次，「成世仔都未試過喎！」佢解釋，因為份報告要交代晒主席鐵頭仁、卿姐同佢自己與中央會面嘅內容，要將三個人嘅行程、事實同記憶夾埋一齊，都幾費力。最弊係：「阿姐（指劉慧卿）有時記得有嘢未講晒要加啲，尋晚畀第六稿佢睇，今朝又同我講要寫第七稿！」張文講笑話，好驚第十稿都「未埋到欄」。
累佢成日交唔到功課嘅卿姐尋晚就去建仔成立十八周年酒會，仲同建仔負責人握手言歡，有人講笑話，佢唔知係咪嚟吸建仔嘅中間票呢？