煲呔曾今年授勳明益自己友，惹來好多是是非非。好似人稱「煲呔針」嘅鄭經翰，政府就以佢有份創辦長者安居服務協會及提供長者平安鐘服務為由，頒咗個金紫荊星章畀佢。
早前就有一位自稱「協會針」嘅長者安居服務協會職員爆料，話「煲呔針」靠平安鐘賺到盆滿缽滿；但協會尋日出嚟澄清，話呢支「協會針」提供嘅資料有誤。
長者安居服務協會發言人話，實情係協會成立初期缺乏資金，「煲呔針」於是投資數百萬元研發及製造第一代平安鐘電話機產品，其後協會由歐洲入口第二代產品取締第一代，但至今「煲呔針」從未向協會收回成本，所以絕無個人利益可言。佢哋又強調協會係非牟利社會企業，營運所得收益都回饋長者服務，包括為兩成無能力負擔月費嘅長者提供免費服務。
唉！煲呔針要到十月先至正式攞到金紫荊，睇怕停不了的風風雨雨陸續有來！