張建宗尋日出席個活動時雖然強調最低工資立法可獲立法會通過，不過，講到議會審議進度時，佢都好無奈咁兩度感嘆「辯論嘅時間可能稍為長一點」。唔使問佢已經向啲政黨收晒風，知道修訂多多，下個禮拜嘅會邊有咁快完呀。

王國興：一於直踩落去

不過，佢講嘅只係最低工資一項議程，當日仲有惹火議題，好似增加豪宅印花稅嘅法例要恢復二讀辯論，高達又會提出出動尚方寶劍《立法會（權力及特權）條例》，要求政府交出地政總署就天滙問題同恒地來往嘅書信，雖然政府喺前日已經交咗啲信出嚟，但若果高達繼續狙擊，誓要抬出特權法，議員都要繼續拗。

所以，有議員私下裏向主席摸底，據講今次一定會開長會，初步估計下周三（十四日）嘅大會至少要開三日，關鍵只係禮拜五要開到幾多點？甚至使唔使通頂。工聯會王國興都話，早兩日立會主席問過佢，萬一下星期嘅大會開到周五都未開完點算？王國興就話一於直踩落去，總之踩到完為止，咁講即係通頂直落到周六都在所不計。

同樣要喺最低工資上同政府拗手瓜嘅職工盟李卓人就樂觀啲，佢話，大會好似未試過開到禮拜六，估計三日應該搞掂喎。