天文台接連發出酷熱天氣警告,老人家特別難捱,幾乎日日都有千幾宗長者按平安鐘求助個案,仲有好多人中暑送院。試想吓,熄匙冇冷氣嘅小巴溫度高達四十幾度,一個上年紀老人坐喺裏面有乜法子唔出事?
老司機嘅死,更加證明政府停車熄匙政策幾咁戇居夾無良。近年香港空氣質素愈嚟愈唔掂,嚇到好多跨國公司都將總部撤走。特區政府下巴輕輕話要盡快改善空氣質素,點知都係吹水唔抹嘴。民怨沸騰,當局就度出停車熄匙呢條屎橋嚟充數。可惜政策一推出,就惡評如潮,但係當局一意孤行,夾硬死撐,卒之法例未實施就搞出人命。
如果班官員有少少責任心,肯聽吓市民意見,就唔會搞到今日咁大鑊。例如,有的士司機團體早就提議,遇到酷熱潮濕天氣應該豁免停車熄匙。政府點回應呀?佢哋話喎,已經派人去同樣實施停車熄匙嘅多倫多考察過,相信香港執法唔會有問題。大佬,多倫多氣候同香港相差十萬八千里,點可以比較呀?係咁,不如去南極考察仲好啦,笨!
當時就有人批評政府「唔見棺材唔流眼淚」,家陣果然搞出人命嘞,政府點講都應該檢討吓喇啩?但係環境局局長邱騰華死性不改,硬係唔接納炎熱天氣豁免方案。佢話喎,停車熄匙唔可以太多豁免,否則就會形同虛設。有環保署官員仲話,豁免過多會對周遭環境造成更大滋擾喎。簡直九唔搭八。
其實,停車熄匙本身就係擾民政策,既擾司機,又擾乘客。嗱,本港嘅的士站多數都係露天嘅,大熱天時,架車停幾分鐘就曬到,車廂裏面唔開冷氣,簡直變咗桑拿房。邱騰華坐喺冷氣房閉門造車,又點會諗得到司機同乘客身水身汗嘅樣子吖!難怪有關注團體要求佢去的士站,坐喺冇冷氣嘅的士裏面,由隊尾排到隊頭,感受吓焗桑拿嘅滋味,邱局長點解唔敢接招呀?
講番司機中暑死亡嘅個案,好彩佢暈低嘅時候車未開,唔係嘅話,架小巴分分鐘變成「無人駕駛戰車」,咁就死得人多咯。
叮佢個鎯鎯!老司機係畀停車熄匙害死嘅,邱騰華等高官就係間接殺人嘅兇手。請問邱局長,究竟要再死幾多人,你哋先至肯收手?