尋日見到遠東集團創辦人邱德根同太太拍拖入馬場睇賽事，佢兩公婆向來有影皆雙，係商場上嘅模範夫妻，但係細子Duncan邱達根最近被影到同o靚模遊船河，邱老太一聽我哋問起件事，就忍唔住嘆氣話，佢事後同囝囝傾過兩句，但仔大仔世界，惟有叫佢行事小心啲啦！
早前Neway太子爺薛嘉麟畀人發現同埋一班富豪第二代，包括已婚嘅Duncan同埋全國人大常委范徐麗泰囝囝范駿華等，同o靚模遊船河，掀起城中一陣熱話，好多涉事當事人嘅父母都免不了幫囝囝解畫。前日范太就話信任乖仔 ，但阿仔已經三十幾歲，都唔管得咁多。
而邱老太就好無奈咁笑謂，佢冇鬧過Duncan，始終囝囝有佢自己嘅朋友，做父母嘅只係勸解佢行事小心啲。Duncan有冇畀太太扭耳仔呢？邱老太好豁達咁話，等佢自己處理啦！Duncan同太太結婚六年，有兩名四歲同兩歲嘅囝囝。