會計界、IT界同醫學界嘅選民，泛民主派同建制派嘅比例五五波，所以兩大陣營次次選舉都喺呢幾個界別爭崩頭，結果亦年年有變。所以一到政改呢啲敏感議題，五散人三子就非常頭痛，因為佢哋屬於親建制派，但又唔可以置近半嘅泛民選民意願於不顧，完全係夾心人。

喺政改表決前，三子各自以政府推出嘅方案做民調諮詢業界。波波話當時覺得反對方案嘅選民佔大多數，怪醫都喺政改表決前三日見煲呔曾時都提過，大部分醫學界選民唔鍾意個方案，如果要佢哋硬撐政改將會好危險，等同陷佢哋於不義。IT界嘅調查結果好少少，大約七成人支持，不過IT豪調查嘅回應率低過一成，拎上手都唔知信唔信佢好。

正當五散人三子都頭痕緊唔知點投票之際，煲呔曾喺政改表決前兩日表明白鴿黨「一人兩票」方案可以接受，就咁打救咗佢哋，令佢哋大條道理話做唔切新民調，自己決定點樣投票；加上方案真係大大增加民主成分，唔少本身反對方案嘅選民都轉軚表示支持，喺呢個基礎上，佢哋要支持方案就更加得心應手，一嚟唔會得罪政府，二嚟又唔使驚違背選民意願而影響下屆選情，可謂一舉兩得。