05/07/2010

播放本新聞相關短片

政情:田二少唔吼超級講席

立法會通過政改方案冇耐,因為方案包括白鴿黨「一人兩票」區議會方案,其中五個區議會功能組別嘅議席將會由三百二十萬喺傳統功能界別冇票嘅選民選出,外界仲話若果有人想競逐下屆特首嘅話,就應該先落場選呢個「超級」區議會議席。

其實,各黨各派依家已經展開部署,睇睇派邊個「分量級人馬」參選。尋日喺一個公開活動中見到富貴黨常委田北辰,問佢有冇諗住落場玩,佢就謙稱唔敢染指呢五席喎!

田二少係有理由嘅,佢話要爭呢五個咁「超級」嘅議席,必須超級知名先得,但佢覺得自己唔係喎,又擔心做咗區議員後,花唔到時間服務當區市民,過唔到自己嗰關。

早前立法會補選,田二少已經先發制人,率先自掏腰包印製十萬份精美單張,仲喺兩個選區派畀選民,可見佢競逐立會議員嘅決心絕對唔細。最後建制派決定集體杯葛補選,先令田二少參選夢碎。不過田二少唔喺區會功能界別議席出選,咪即係疊埋心水喺新界西參加分區直選囉,可能佢早已決定喺呢區出選,唔想兩頭唔到岸呢。