年近八十歲嘅香港婦協主席林貝聿嘉，曾經做過全國政協委員，亦做過灣仔區議會主席，經歷過香港多變嘅政治氣候，原來對服飾嘅要求都係多變，正如佢鍾情百達翡麗（Patek Philippe）一款可以換錶帶嘅鑽石手錶，一口氣買埋黑白兩色錶帶。
林太早前出席朋友嘅新書發布會，手挽LV袋，潮流觸覺唔會輸畀後生女。林太右腕戴住一隻白色百達翡麗，佢話隻錶買咗兩、三年，係買嚟氹自己開心。
呢隻錶型號係5067A Aquanaut Luce，賣點係錶面鑲有四十六粒鑽石，閃閃生輝，價錢超過十萬。不過最吸引林太嘅唔係啲鑽石，而係條白色膠錶帶，簡約中顯優雅，林太愈睇愈鍾意，襯上身百搭到極，於是畀多千幾蚊，買埋另一條黑色錶帶，得閒換吓款，又係另一種生活樂趣。