呢屆世界盃認真多「意外」，特別係前晚阿根廷對德國場賽事，阿根廷被淘汰出局，好多球迷都跌晒眼鏡，但係全國政協常委陳永棋就自爆話，前日心血來潮投注二百六十蚊買德國贏，結果贏咗八百幾蚊！
棋哥匹愛駒「精密紡」尋日喺沙田馬場出賽，佢梗要去捧場啦，雖然愛駒唔爭氣輸咗，但佢首次買波就中，手氣唔錯。咁會唔會乘勝追擊，喺德國對西班牙場賽事再試吓呀？佢話若果德國喺四強勝出，打入決賽，佢都會再買波支持吓。
另外，「演唱會之父」張耀榮喺澳門就同朋友打牙骹戰，貼中德國隊贏波，佢大讚德國隊表現好精彩。另一邊廂，阿根廷粉絲就大失所望嘞，立法會議員林大輝前日喺維園踢完波，去栢寧酒店食飯兼睇波，點知睇住阿根廷慘敗。佢冇晒心機咁話，嚟緊唔捧南美喇！
馬會主席陳祖澤係巴西、阿根廷球迷，但兩隊相繼執包袱返家鄉，佢都話冇辦法，餘下賽事佢會轉捧德國隊。馬會大董利子厚雖然捧阿根廷場，但佢都輸得心服口服，仲勁讚德國隊犀利到好似機械人咁，話阿根廷的確技不如人喎。