本文重點
煲呔曾團隊早前搞政改起錨騷，劣評如潮，最終拋錨收場，政改爭議依家塵埃落定，煲呔曾由政治騷舞台返到現實世界，同樣面對拋錨危機！事關佢同政改首席推銷員唐唐嘅政府座駕，採用凌志（Lexus）LS600hL型號，咁啱就係日本豐田車廠日前宣布旗下八款因引擎出問題而隨時行駛途中死火拋錨嘅車款之一，所以煲呔曾團隊再受拋錨陰霾困擾。
日本豐田車廠旗下嘅凌志同皇冠（Crown）八個車款，因引擎出問題隨時行駛途中突然死火拋錨，豐田考慮全球回收二十七萬部汽車。政府物流服務署話，八個出問題車款中，其中LS600hL型號，特區高官座駕中有三部，一部喺特首辦，用嚟做煲呔曾座駕，兩部喺政務司司長辦公室，即唐唐有份用。雖然八個出問題車款中，香港只回收凌志LS460同LS600h兩款型號，LS600hL暫時未受影響，但LS600hL同LS460、LS600h採用同一款引擎，拋錨陰影黑壓壓咁籠罩住禮賓府同下亞厘畢道上空。
需要更換零件
政府物流服務署話，署方已經收到凌志代理商通知，需要更換零件，待代理通知零件到港，就會拎部車去換零件。至於煲呔曾會唔會換車，物流署回覆，凌志代理話部車仍然可以用喎，又話煲呔曾嘅座駕用咗三年，一直未收過有問題報告，咁講即係煲呔曾會繼續用LS600hL代步啦。
煲呔曾為催谷政改方案，早前花費九百萬元大搞起錨騷，勞民傷財之餘，亦因為做騷不得其法，多項民調均顯示，起錨騷後更多市民反對政改方案，煲呔曾因而被人嘲笑起錨變拋錨。拋錨陰霾未散，依家煲呔曾架座駕又捲入回收風波，現實人生中再度面臨拋錨危機，真係相當諷刺。