廢柴辦有幾廢柴？聽吓署任總監伍芷筠點講就知。佢話喎，今時今日，各個政府部門對樹木嘅風險評估表格標準依然唔一致，至於樹木辦巡查發現有問題嘅二千棵樹名冊，會喺本月中公布。

咁就奇啦，當局點解要成立樹木辦？咪就係因為管樹部門太多咯，咪就係因為管樹部門各自為政、互相卸膊咯。家陣樹木辦成立咗幾個月，各個部門對樹木嘅評估標準依然七國咁亂，咁仲要樹木辦嚟做乜？

至於講到有問題嘅樹木名冊，其實早就應該公布啦，等市民預先知道邊啲樹木有問題，防患未然吖嘛。唔知樹木辦究竟有乜嘢難言之隱，居然對巡查結果秘而不宣，畀人三催四請下，先至話遲啲會公布喎。叮，呢段時間大家出街最緊要打醒十二分精神，最好戴定頭盔，如果唔係，隨時飛來橫禍，咁就邊度都唔使去。

講開又講，雖然樹木辦係廢柴辦，但都唔係一無是處嘅，事關樹木辦連同綠化辦每年要使一千九百萬元公帑，開設二十幾個新職位，其中三個係首長級職位添，咁假假哋都叫做製造就業機會吖，最低限度可以為自己友提供晉升機會吖嘛。

老實講，如果樹木辦真係可以防止冧樹殺人，使多啲錢納稅人都冇話可說，可惜樹木辦成立至今，冧樹慘劇唔止冇少到，仲愈冧愈多，愈冧愈大鑊。呢，上月中，沙田圓洲角有一棵盾柱木折斷，砸死一位踩單車嘅中年漢；上月底，中區政府合署一棵十五米高、一米闊嘅大樹忽然冧低，壓傷一位男途人同壓毀一輛的士……

冧樹冧到政府總部門前，證明樹木辦果然係廢到冇朋友。其實，樹木本無心，庸官惹塵埃，香港地冧樹冧到停不了，皆因官員一個二個好似碌木咁。

一句講晒，管理樹木根本唔難，難就難在官員唔上心，試吓有次冧樹砸到啲高官吖喇，睇吓佢哋仲敢唔敢懶懶閒，叮！