本文重點
「大專2012」成員兼中文大學三年級學生周澄自揭喺尖東新花都夜總會做過舞小姐後，城中傳聞多多，包括質疑佢做嘅嘢絕唔只係佢所講嘅「賣笑不賣肉」嗰種，民主新偶像被疑「賣肉女神」之外，佢就讀嘅中大都多得佢唔少，新任校長沈祖堯唔肯評論周澄事件，曾經做過中大校長嘅前教統局局長李國章（阿瑟王）尋日就敢言開腔，寄語學校一定要教好下一代道德教育，又叫中大新校長去搞番掂佢。
赴英賀結婚36周年
阿瑟王日前同外籍太太坐住架名貴嘅凌志房車去香港會吃晏，車牌仲係佢嘅英文名添，我哋問到佢點睇周澄呢件事，佢就笑笑口話：「由新校長去搞番掂佢囉，我離開咗（中大）就唔關我事喇！」講完之後，佢傍住太太慢慢向前行，臨尾都補多句：「一定要教好下一代嘅道德教育！」長年從事教育工作嘅阿瑟王呢句真係可圈可點，道德教育係教育嘅根本，無德做乜嘢都好難令人信服。
冇見阿瑟王一輪，原來佢近排喜事重重，上個月二十七日先至啱啱過完六十五歲生日，今個月下旬又係佢兩公婆結婚三十六周年紀念，佢哋遲啲會去英國倫敦參加姪兒婚禮，並順道慶祝。