下一屆特首選舉嘅疑似人選都未浮出枱，暗戰卻早已拉開序幕，近日最矚目嘅焦點要數全國人大常委范徐麗泰同行政會議召集人梁振英（CY）隔空開火，日前范太喺茶敍暗批行會成員唔應該同政府唱反調，CY迅即喺網誌還火，尋日范太出席一個活動，繼續發功，仲以自己回歸前喺行政局（行政會議前身）嘅經驗，寸盡喺最低工資同復建居屋問題上都同政府唱對台嘅CY。
范太點解咁高調？有人質疑佢想藉着打擊CY，為自己選特首鋪路，范太一聽，忍無可忍話自己幾個月前已話過唔會入場玩。至於行會運作，佢話當年身為行政局議員時，只要行會討論過嘅議題，無論個人有乜意見都唔會輕易同傳媒講：「我哋當年嘅行政局首席議員，從來未試過同政府有任何唔同嘅地方，可能佢私下都未必贊成晒，但佢唔會講！但可能當年嘅行政局同今日嘅行政會議完全係兩回事。」
呢番話，無異於明寸近期再三同政府唱反調嘅CY，不過，范太最後都加番句：「佢鍾意講乜都得，同樣我鍾意講乜都得！」咁又係，大家都有言論自由，誰是誰非，最好等市民去評理。
另外，早幾日范太囝囝范駿華畀雜誌影到攬G模開P，范太話聽咗佢嘅解釋，當日上船嘅都係熟朋友，佢信個仔講嘅嘢。范太仲話，個仔成三十幾歲，做老人家都無謂囉囉嗦嗦，費事影響大家嘅關係。